poster image

Fiðrildafögnuður UN Women á Íslandi

14. nóvember kl. 20- 22 í Hörpu

Við bjóðum ykkur að koma og gleðjast yfir árangrinum sem náðst hefur í jafnréttismálum í heiminum; kraftinum sem myndast þegar konur brjóta staðalmyndir og hefðir. Við krefjumst þess að mannréttindi kvenna og stúlkna séu virt.

Kvöldið er tileinkað þolendum sýruárása en við fáum ógleymanlegt tækifæri að kynnast indverskum konum sem lifað hafa af slíkar árásir.

Fiðrildafögnuður UN Women verður ævintýralegt kvöld. Helsta listafólk Íslands leggur samtökunum lið og býður ykkur upp á magnaða upplifun. Dansarar Íslenska dansflokksins sýna verk, landsþekktar leikkonur verða með gjörning, Sigríður Thorlacius og Högni Egilsson skemmta svo fátt eitt sé nefnt.

Leggðu systrum þínum um heim allan lið með því að mæta á þetta mikilvæga kvöld og hjálpa okkur að gera það sem eftirminnilegast.

Sýruárásir tíðkast um allan heim en eru hvað algengastar í suðaustur Asíu. Sýra er ódýrt og aðgengilegt vopn sem leggur líf kvenna í rúst. Fyrir utan mikla líkamlega fötlun sem fylgir sýruárásum, fylgir iðulega samfélagsleg útskúfun og takmarkaðir möguleikar á að taka þátt í samfélaginu á nýjan leik.

Allur ágóði af kvöldinu rennur til Styrktarsjóðs Sameinuðu þjóðanna til afnáms ofbeldis gegn konum. UN Women vinnur að því að uppræta sýruárásir á margvíslegan hátt.  

Prentaðu út miðann þinn og komdu með hann í verslun ELLU á Ingólfsstræti 5, 101 Reykjavík eða á viðburðinn sjálfan og þar færðu fallegt vinaarmband. Vinaarmböndum fylgir aldagömul hefð á Indlandi. Þegar boðið er til veislu deilir gestgjafi ávallt vinaarmböndum til gesta sinna sem mæta síðan í veisluna með armbandið á hendi.

Samkvæmt indverskum hefðum á einhver sem þér er kær að binda það á þig. Þetta armband er aðgöngumiði þinn á fögnuðinn. Það varð til er átta hugaðar indverskar konur sem lifað hafa af sýruárásir komu saman í Nýju Delí. Því biðjum við þig um að láta einhvern sem er þér kær að binda armbandið á þig og við vonum að þú berir það með stolti.

UN Women er eina stofnun SÞ sem vinnur að jafnrétti og valdeflingu kvenna og stúlkna um heim allan. Íslenska landsnefndin starfar með það að leiðarljósi að vekja landsmenn til vitundar um stöðu kvenna í fátækustu löndum heims og  mikilvægi þess að styðja konur svo að þær og fjölskyldur þeirra fái notið allra þeirra tækifæra sem lífið hefur upp á að bjóða. 

Miðaverð 3.900 kr.