Harpa er tengd við íslenska raforkukerfið sem hefur eitt hæsta hlutfall nýtanlegs tíma í heiminum.

Loftræsting í sölum Hörpu er stillt eftir nýtingu hverju sinni til að tryggja að engin orka fari til spillis.

Smærri rými eru með skynjara til að hámarka nýtingu orku hverju sinni.

Hiti frá sölum er endurnýttur með því að streyma honum áfram í framhús til að hita opin almenningsrými sem og í bílakjallara.

Árið 2021 var lokið við að LED-væða ljós í öllum sölum og almenningsrými Hörpu. Árið 2024 var neðri hluti bílakjallara (K1) einnig LED væddur og mun efri hæðin (K2) verða kláruð árið 2025.

Veturinn 2022 voru settar upp 13 rafhleðslustöðvar í bílahúsi Hörpu í neðri kjallara sem eru opnar öllum með ON hleðslulykil.

Allar einnota matarumbúðir í Hörpu eru endurvinnanlegar. Í Hörpu eru haldar um 500 ráðstefnur á ári hverju þar sem gestafjöldi skiptir þúsundum. Í langflestum tilfellum er boðið upp á veitingar og því mikið magn umbúða, s.s. pappaglasa notað á viðburðum. Því skiptir miklu máli við flokkun að allar umbúðir séu endurvinnanlegar.

Til að gæta enn betur að flokkun var bætt við vökvahólfi á ruslatunnur í húsinu árið 2024. Gesta geta þannig hellt vökva úr glösum áður en hent er í papparusl svo vökvinn skemmi ekki úrganginn og þar með flokkun og endurvinnslu sorpsins.

Starfsfólk hefur á undanförnum árum aukið vitund sína um mikilvægi umhverfisverndar og tekið virkan þátt í sjálfbærnivegferð Hörpu.

Einn þáttur í bættri umhverfisvitund er að minnka pappírssóun og hefur prentun á A4 blaðsíðum hjá starfsfólki dregist saman um 64% frá árinu 2019, eða farið úr 89.000 bls. niður í 25.000 bls.

Fleiri valkostir hafa einnig verið innleiddir til að koma í stað útprentunar, s.s. aukin rafræn miðlun og gagnageymsla. Harpa nýtir tækni sem veitir aðgang að upplýsingum án þess að prenta út og dregur þannig úr mengun og sparar auðlindir.

Handblásar í stað pappírsþurrkna

Sumarið 2024 var 21 handblásari settur upp á salernum fyrir gesti og var það stórt skref í að minnka blandað sorp. Handblásarar eru umhverfisvænn, hagkvæmur og þægilegur kostur sem dregur úr pappírsnotkun og minnkar þannig kolefnisfótspor, stuðlar að minna skógarhöggi og minni ruslmyndun.

Harpa afþakkar allan fjöldapóst.

Harpa hefur á grænni vegferð sinni leitað ýmissa leiða til að minnka umhverfisfótspor sitt og skoðað flesta þætti í starfsemi sinni til að gera úrbætur. Ein af fjölmörgum aðgerðum sem ráðist hefur verið í er að nota fjölnota rafhlöður í stað einnota. Í annasömu viðburðahúsi sem Hörpu eru rafhlöður gríðarlega mikið notaðar og þá einkum í míkrófóna.

Framleiðsluferlið við gerð rafhlaðna hefur töluverð umhverfisáhrif þar sem þau eru gerð úr kolum og kolefnisfótspor hleðslurafhlaðna er margfalt minna en einnota rafhlaðna. Harpa fargar rafhlöðum á ábyrgan hátt í gegnum Terra efnaeyðingu en kaup á rafhlöðum hefur farið mjög svo minnkandi með árunum. Einnota rafhlöðunotkun hefur lækkað um 67% frá árinu 2019 en milli áranna 2023 og 2024 var lækkunin 20%.

Árið 2023 tók Harpa mikilvægt skref í styrkingu hringrásarhagkerfisins með því að gera kröfu á seljendur búnaðar innan örútboðs að taka upp í eldri búnað frá Hörpu til endurnýtingu eða umhverfisvænnar endurvinnslu.

Markmiðið með hringrásarhagkerfinu er að draga úr auðlindanotkun, auka líftíma auðlinda jarðar og koma í veg fyrir að efni og hlutir hverfi úr hagkerfinu sem úrgangur. Á árinu var skipt út mixerum og tók söluaðilinn við gömlum mixerunum til að koma þeim inn í hringrásina. Einnig leggur Einnig leggur Harpa áherslu á að hafa auka ábyrgðartíma á tækjum til að ýta á framleiðendur og seljendur að gera vöruna endingarbetri. Harpa verslaði ekki eingöngu nýjar vörur heldur voru á árinu keypt keypt notuð ljós, myndavélar og myndvarpi.

Vilji Hörpu er að koma eldri lömpum eða lampaíhlutum í endurnýtingu eða endurvinnslu. Árinu 2023 hófust umfangsmiklar endurbætur á lýsingu í bílakjallara Hörpu. Tekin var ákvörðun um að nýta eldri ljósabúnað og tengingar áfram og breyta núverandi ljósum yfir í LED. Verkefnið var unnið í samstarfi við Lampar.is (áður Flúrlampar ehf.) sem framleiddi nýjan búnað inn í lampana. Með þessum hætti var allt nýtt áfram sem hægt var en á sama tíma verður lýsingin LED sem stuðlar að orkusparnaði. Upprunalegu lamparnir eru íslensk hönnun og framleiðsla og endurbæturnar voru líka íslensk framleiðsla en Harpa telur mikilvægt að styðja við íslenska framleiðslu eftir bestu getu. Neðri hæð bílakjallar Hörpu (K2) var LED-væddur að fullu á árinu 2024 og verður það sem eftir er á efri hæð kjallarans ( K1) klárað á árinu 2025.

Harpa geymir óskilamuni á öruggum stað í allt að þrjá mánuði en að þeim loknum eru óskilamunir flokkaðir og gefnir í góðgerðamál. Sumar flíkur fara í Konukot og aðrir óskilamunir eru settir á vegginn í Mæðragarðinum í Lækjargötu, sem er fyrir þá sem þangað þurfa að leita eftir hlýjum fatnaði. Verðmæti, eins og vesti og símar, eru afhent lögreglunni.

Harpa gerir árlega greiningu á allri úrgangsmyndum og setur markmið um minnkun úrgangs.

Vatnið sem notað er í Hörpu er frá drykkjarvatnslindum í nágrenni Reykjavíkur. Íslenskaið vatn er einstakt að gæðum og þarfnast engrar meðhöndlunar áður en því er dreift til neytenda

Settar hafa verið upp öflugar stýringar á kerfum hússins til að ná góðum árangri í að spara rafmagn og heitavatnsnotkun.

Sérstök áhersla hefur verið lögð á loftræstikerfi hússins, en í húsinu eru 19 loftræstisamstæður sem taka til sín mikið rafmagn. Með því að ná betri stjórn á þessum kerfum og samþætta virkni þeirra við starfsemina í húsinu, hefur verið tryggt að orkunotkunin sé eins hagkvæm og kostur er.

Í dag eru salir hússins eingöngu kynntir þegar þeir eru í notkun sem tryggir að orka fer ekki til spillis þegar ekki er þörf á henni.

Markvisst hefur verið unnið að því að skipta út ljósum fyrir LED-búnað, sem hefur haft mikil áhrif á orkuforða og dregið úr orkunotkun. Þá er einnig fylgst með nýjustu tækninýjungum sem hjálpa til við að nýta orku á sem hagkvæmastan hátt. Með þessum aðgerðum hefur Harpa náð árangri í því að minnka bæði kostnað og kolefnisspor og heldur áfram að þróa nýjar lausnir sem stuðla að betri orkunýtingu.

Harpa hefur náð framúrskarandi árangri í því að spara rafmagn og notkun á heitu vatni á undan förnum árum. Þessi góði árangur sýnir skýrt þann metnað sem ríkir hjá félaginu og ekki hvað síst þá samfélagslegu ábyrgð sem Harpa sýnir í umhverfismálum.

Frá árinu 2018 hefur rafmagnsnotkun dregist saman um 31,4% m.v. árið 2024 á meðan notkun á heitu vatni hefur dregist saman um 52,1% frá árinu 2019. Þessar tölur sýna án nokkurs vafa að Harpa er ekki aðeins leiðandi í menningu og listum á Íslandi, heldur einnig í sjálfbærni og árangri í umhverfismálum.

Með orkusparnaði og minni sóun er ekki einungis verið að draga úr kolefnisspori heldur er einnig verið að spara umtalsverðan kostnað sem skiptir gríðarlega miklu máli fyrir daglegan rekstur hússins sem og framtíðarrekstur. Harpa er leiðandi fordæmi fyrir aðrar stofnanir og fyrirtæki, sem vilja draga úr kolefnisfótspori sínu og vinna að sjálfbærni.

Með framlagi Hörpu í umhverfismálum, staðfestist að tónlistar- og ráðstefnuhús getur ekki aðeins verið miðstöð menningar og mannlífs heldur einnig leiðandi í grænum lausnum. Harpa er sannarlega fyrirmyndin þegar kemur að því að sameina listir og sjálfbærni og er stolt af því að leggja sitt af mörkum til betri framtíðar.