Future Forecast - Lista­hátíð í Reykjavík

Future Forecast samanstendur af sjö glænýjum verkum sem upphaflega spretta upp úr vel ígrunduðum hugmyndum um hvernig tónlist framtíðarinnar kynni að hljóma, ef vikið yrði frá fyrirsjáanlegum formum, hendingum og hljóðmyndum, en þess í stað leitað fanga í nýjum víddum. Nálgunin byggir á áhugaverðum tilviljunum og áhrifavöldum auk leitinni eftir nýmælum. Sköpunarferlið sem hófst með auðu blaði í Fljótunum í Skagafirði, þróaðist í skapandi síflæði í Flóka hljóðverinu þar sem óvænt samsetning og sameiginleg innöndun tónlistarfólksins var vegnestið heilladrjúga. Afraksturinn getur að heyra í þeim 7 ópusum sem hér verða kynntir áheyrendum fyrsta sinni í lifandi flutningi á Listahátíð í Reykjavík.

Um skrautlegan feril Stuðmanna þarf ekki að fjölyrða en margir liðsmenn sveitarinnar hafa gert sig gildandi í víðu, skapandi og fjölþjóðlegu samhengi um árabil. Peter Erskine á að baki glæstan feril með Weather Report, Steely Dan, Joni Mitchell o.fl. Matthew Garrison er í fremstu röð bassaleikara heimsins um þessar mundir og bandaríski saxófónleikarinn Phil Doyle hefur fyrir löngu skipað sér í hóp fremstu tónlistarmanna sem starfa á Íslandi. Auk ópusasafnsins Future Forecast verða á tónleikunum rifjuð upp nokkur af þekktustu verkum meðlima Jack Magnet Science teymisins.

Listrænir aðstandendur: Jack Magnet Science: Jakob Frímann, Ragga Gísla, Dísa Jakobs, Eyþór Gunnarsson, Guðmundur Pétursson, Einar Scheving, Sigtryggur Baldursson, Phil Doyle

Sérstakir gestir: Peter Erskine, Matthew Garrison

Lengd: 90 mínútur