Sviðið í Silfurbergi getur verið í mismunandi stærðum og er færanlegt. Sætin eru laus og gólfið flatt, en koma má fyrir innbyggðum hallandi sætum við enda salarins.

Hægt er að skipta salnum í tvennt með fellivegg sem er hljóðeinangraður og rúmar þá hvor salur (Silfurberg A og Silfurberg B) um sig um 300 gesti í sæti. Tvennar hljóðeinangraðar dyr tengja Silfurberg og Norðurljós, en hægt er að samnýta salina fyrir stærri viðburði.

Grænalón er baksviðsrými salanna á 2. hæð og þaðan er inngengi í Silfurberg. Búningsherbergi eru af ýmsum stærðum, allt frá tveggja manna herbergjum upp í 10 manna herbergi og mögulega enn stærri rými fyrir kóra og stærri hópa.

Tvö búningsherbergi fylgja leigu á Silfurbergi, án endurgjalds, en framboð þeirra ræðst þó af bókunarstöðu hússins og þau þarf að bóka hjá verkefnastjóra eða viðskiptastjóra eftir atvikum. Hægt er að óska eftir fleiri búningsherbergjum gegn gjaldi ef bókunarstaða hússins leyfir.