Harpa tónlistar- og ráðstefnuhús hefur samið við Rannsóknarsetur skapandi greina um greiningu á hagrænum áhrifum Hörpu. Áhrifin verða skoðuð út frá menningar- og ráðstefnustarfsemi Hörpu, rekstri og útleigu fasteignarinnar og þeirri þjónustu sem veitt er af þriðja aðila í húsnæðinu.

Lagt verður mat á beint, óbeint og afleitt framlag þessarar starfsemi til hagkerfisins og hins opinbera. Í undirbúningi fyrir rannsóknina verður litið til erlendra fyrirmynda að sambærilegum úttektum á hagrænum áhrifum annarra tónlistar- og/eða ráðstefnuhúsa víða um heim. Leitað verður til ýmissa samstarfs- og hagaðila Hörpu við gagnaöflun og greiningarvinnu, svo sem Meet in Reykjavík, Tónlistarmiðstöðvar og stærri viðburðahaldara.

Rannsóknarsetur skapandi greina (RSG) var stofnað árið 2023 með það að markmiði að efla rannsóknir á atvinnulífi menningar og skapandi greina. Setrið sinnir bæði fræðilegum rannsóknum og þjónustuverkefnum, auk þess að halda málþing og efla nýliðun og samtal innan fræðasamfélagsins og milli þess og annarra hagaðila og notenda. Setrið hefur undanfarið ár komið að þremur smærri þjónustuverkefnum, haldið tvö málþing, mótað rannsóknastefnu og sótt í innlenda rannsóknasjóði. Hagræn áhrif Hörpu er fyrsta þjónusturannsóknin sem er alfarið í höndum RSG og markar því ákveðin tímamót í uppbyggingu setursins.

Gert er ráð fyrir að niðurstöðurnar verði kynntar fljótlega á nýju ári.