Harpa tónlistar- og ráðstefnuhús og flugfélagið Icelandair hafa undirritað samstarfssamning til þriggja ára. Markmiðið er að vekja athygli á Íslandi sem spennandi alþjóðlegum áfangastað og sérstöðu Hörpu fyrir ráðstefnur, tónleika og aðra menningartengda viðburði.

Harpa og Icelandair munu meðal annars starfa saman að því að fjölga fjölbreyttum, alþjóðlegum viðburðum í Hörpu en slíkir viðburðir teljast mjög verðmætir fyrir íslenskt efnahagslíf og ferðaþjónustu.

Svanhildur Konráðsdóttir, forstjóri Hörpu, segir að Harpa sé tónlistar- og ráðstefnuhús á heimsmælikvarða og samstarf við Icelandair sé einn liður í undirbúningi fyrir spennandi alþjóðlega dagskrá.

„Harpa hefur áður átt afar gott samstarf við Icelandair og eftir varnarbaráttu síðustu missera vegna heimsfaraldurs er kominn tími á samstillta og markvissa sókn. Bæði félögin eru markaðsdrifin og vilja fjölga erlendum gestum sem sækja okkur heim til að taka þátt í ráðstefnum, fundum og fyrirtækja- og menningarviðburðum. Ég er sannfærð um að þetta samstarf muni leiða til aukinnar verðmætasköpunar og nýrra tækifæra,“ segir Svanhildur.

Bogi Nils Bogason, forstjóri Icelandair, tekur í sama streng og segir Ísland vera í góðri stöðu til að halda alþjóðlega viðburði vegna staðsetningar landsins á milli Evrópu og Norður Ameríku, öflugra flugsamgangna. „Með þessu samstarfi viljum við styrkja stöðu Íslands og íslenskrar ferðaþjónustu enn frekar og laða að gesti í gegnum alþjóðlega viðburði allan ársins hring,“ segir Bogi.

Fyrsti viðburðurinn sem samstarfið tekur til er heimsókn Kyiv Grand Ballet frá Úkraínu sem flytur Hnotubrjótinn ásamt Sinfóníuhljómsveit Íslands fyrstu helgina í aðventu. Ballettinn er skipaður mörgum af skærustu stjörnum úkraínska ballettsviðsins, en haldnar verða fjórar sýningar í Eldborg 24. – 26. nóvember næstkomandi.

Nánari upplýsingar um Hnotubrjótinn