Fólkið okkar

Kjarninn í stefnunni er að skapa sveigjanlegt og jákvætt starfsumhverfi þar sem virðing og jöfn tækifæri eru höfð í hávegum.  

Stefnan er skuldbinding Hörpu til að vinna markvisst að umbótum í jafnréttis- og mannréttindamálum, þar sem fylgt er eftir lögum og reglum um jafna stöðu og tækifæri starfsfólks. Lög um jafna stöðu og jafnan rétt kynjanna nr. 150/2020 og lögum nr. 86/2018 um jafna meðferð á vinnumarkaði. Lög um mannréttindasáttmála Evrópu nr.62/1994 og mannréttindaákvæði stjórnarskrár Íslands eru einnig lögð til grundvallar í jafnréttis- og mannréttindastefnu Hörpu.

Harpa virðir Barnasáttmála Sameinuðu þjóðanna hvað réttindi barna og ungmenna varðar og virðir og líður hvorki barnaþrælkun né nauðungarvinnu. Félagið fer að lögum og reglum hvað þetta varðar í allri starfsemi sinni og gerir viðlíka kröfur til samstarfsaðila og birgja. Harpa leggur sig fram við að tryggja öruggt og heilsusamlegt starfsumhverfi og framkvæmir reglubundið áhættumat til að stuðla að sem bestri heilsu, öryggi og forvörnum á vinnustaðnum. 

Markmiðið með stefnunni er að stuðla að jafnrétti þar sem kynja- og jafnréttissjónarmið eru samofin starfsemi félagsins. Harpa hefur valið fimm Heimsmarkmið Sameinuðu þjóðanna að leiðarljósi í starfsemi sinni og er þar meðal annars lögð áhersla á heilsu og vellíðan starfsfólks jafnrétti kynja og þjónustu við gesti. 

Jafnréttis- og mannréttindastefna Hörpu

Jafnlaunavottun og launagreining

Harpa er með faggilta jafnlaunavottun, en meginmarkmið slíkrar vottunar er að vinna gegn kynbundnum launamun og stuðla að jafnrétti kynjanna á vinnumarkaði. Þriðja hvert ár er vottunin tekin út og var síðasta úttekt og endurnýjun vottunarinnar hjá Hörpu árið 2023. Niðurstöður launagreiningar Hörpu fyrir árið 2023 sýna að kynbundinn launamunur mælist 0,9% konum í vil. Þessi munur stendur eftir þegar heildarlaun karla og kvenna eru borin saman að teknu tilliti til starfaflokkunar, þegar starfsaldur er metinn í fagi og fastra eða breytilegra launa.

Nánar um jafnlaunastefnu Hörpu

Vinnustaðagreiningar 

Harpa gerir reglulega vinnustaðagreiningar þar sem starfsfólk er beðið um að lýsa skoðun sinni á málefnum er snúa að vinnustaðnum og líðan þeirra þar. Eins tekur Harpa þátt í könnun VR um Fyrirtæki ársins og fær þar samanburð við aðra vinnustaði á viðhorfi starfsfólks. Lögð er áhersla á andlegt og líkamlegt öryggi starfsfólks og er áhættumat framkvæmt því til stuðnings og brugðist við þar sem þurfa þykir.

Öruggur vinnustaður

Ánægjulegt er að greina frá því að engin slys eða næstum slys voru skráð á starfsfólk á árinu. Harpa er með virkt athugasemdakerfi þar sem haldið er utan tilkynningar sem varða öryggismál. Kerfið er opið starfsfólki Hörpu sem og íbúum þess og geta öll sett inn ábendingar og skráð atvik ef þau verða.

Í samskiptasáttmála starfsfólks Hörpu eru virðing, fagmennska og jafnræði í forgrunni  og er áhersla lögð á að öll samskipti og hegðun á vinnustaðnum endurspegli þau gildi. Harpa leggur áherslu á gagnkvæma virðingu í samskiptum og greiða leið að stuðningi í tengslum við samskiptavanda ef hann kemur upp.  

Samgöngusamningur

Eldsneytisnotkun farartækja myndar hluta af kolefnisspori Hörpu. Það er því lögð mikill áhersla á að hvetja starfsfólk til að nýta sér umhverfisvæna kosti til og frá vinnu. Með umhverfisvænum kostum er átt við allan ferðamáta annan en að ferðast til og frá vinnu á einkabíl, svo sem að ganga, hjóla eða ferðast með strætisvögnum. 

Harpa hóf að bjóða starfsfólki samgöngusamning árið 2021 en árið 2023 var boðið upp á tvær gerðir af samgöngustyrkjum, allt árið eða frá maí til september. Þar sem vinnutími flests starfsfólks er ekki hinn hefðbundni frá kl. 8:00 til 16:00 þá hefur starfsfólk ekki treyst sér í að taka upp samgöngustyrkinn. Gerð var könnun meðal starfsfólks um ferðavenjur og var ein spurningin „Hvaða hvati þarf að vera til þess að þú veljir samgöngusamning?“ og kom þar í ljós að almennar samgöngur þurfa að vera tíðari til að það mundi borga sig. Kannanir sýna að heildarlosun af samgöngum starfsfólks var 25,6 tCO₂í en 2023 17,3 tCO₂í. Má rekja það til þess að fleira starfsfólk hafði fest kaup á rafmagnsbíl á árinu. Notkun á almenningsamgöngum stóð í stað milli ára, eða 1,1 tCO₂í á ári.