Viðburðir
Árið var viðburðaríkt í Hörpu og kom fólk saman til að njóta góðra stunda - gleðjast og fræðast á tónleikum, leik- og óperusýningum, ráðstefnum, vörusýningum, fundum, veislum og mörkuðum sem haldnir voru í samkomuhúsi allra landsmanna.
Harpa er tónlistar- og ráðstefnuhús á heimsmælikvarða sem milljónir gesta hafa heimsótt frá opnun. Á árinu heimsóttu um 1,4 milljónir gesta Hörpu og voru alls 1.398 viðburðir, innlendir sem erlendir, af öllum stærðum og gerðum haldnir í húsinu.
Fjöldi viðburða jókst um rúm 10% á milli árana 2022 og 2023. Umfangsmiklir og eftirtektarverðir viðburðir fóru fram í Hörpu á árinu. Ber þar helst að nefna Leiðtogafund Evrópuráðsins sem fram fór í maí. Fundurinn vakti heimsathygli með leiðtoga og aðra fulltrúa allra aðildarríkja Evrópuráðsins samankomna í Hörpu, í fjórða sinn í 74 ára sögu ráðsins.
Fjöldi viðburða 2021 - 2023
Samsetning viðburða 2021-2023
Skipting viðburða 2023
Tónleikahald
Tónleikahald var ríkulegt á árinu og margir nafntogaðir listamenn komu fram í Hörpu. Má þar nefna: Júníus Meyvatn, GusGus, GDNR, Nýdönsk, Eivör, Vök, Guðrúnu Árný, Lukas Graham, Wilco, Jethro Tull, Disco Buscuites og marga fleiri. Ýmsir heiðurs- og afmælistónleikar fóru fram og afmælis“börn“ ársins voru meðal annarra: Todmobile, Jón Ólafson, Magnús Kjartansson, Óskar Pétursson,Tónmenntaskóli Reykjavíkur, Kvennakór Reykjavíkur og fleiri. Fjöldi jólatónleika fóru fram á aðventunni líkt og fyrri ár. Að venju skipaði klassíska senan einnig sinn sess í Hörpu auk fjölda kóra og lúðrasveita sem juku enn á fjölbreytileika dagskrár árins í Hörpu.
Ráðstefnur og fundir
Harpa er ráðstefnuhús á heimsmælikvarða og laðar að sér sífellt fleiri erlendar ráðstefnur. Umfangsmesti viðburðurinn var Leiðtogafundur Evrópuráðsins, sem kallaði á mikinn undirbúning og utanumhald af hálfu Hörpu. Hringborð Norðurslóða (Arctic Circle) fór fram með hefðbundnum hætti í október og sóttu rúmlega 2000 manns þingið að þessu sinni. Heimsþing kvenleiðtoga (Reykjavik Global Forum) fór fram í nóvember þar sem saman komu kvenleiðtogar hvaðanæva úr heiminum. Aðrir árlegir viðburðir voru UTmessan, Læknadagar og Hönnunarmars, auk fjölda annarra ráðstefna, funda, útskrifta, borgaraferminga, einkaviðburða og árshátíða.
Tónleikaraðir og hátíðir
Árið hófst með Myrkum músíkdögum í janúar. Tónleikarröðin Sígildir sunnudagar, þar sem áherslan er á klassíka tónlist, fékk sögulegt magn umsókna og komust færri að en vildu. Haldnir voru 22 fjölbreyttir tónleikar þar sem fram komu meðal annarra; Kammermúsikklúbburinn, Sæunn Þorsteinsdóttir sellóleikari og Barokkbandið Brák. Múlinn jassklúbbur var að vanda með sína reglulegu tónleika yfir veturinn, þar fá ungir sem og þekktari tónlistarmenn í jasssenunni sviðið, á árinu komu meðal annarra fram Kári Egilsson, Ragga Gröndal, Kvartett Ólafs Jónssonar og Kvintett Sigurðar Flosasonar. Stórsveit Reykjavíkur var með sína fjölbreyttu tónleikum yfir árið. Hátíðirnar Íslensku tónlistarverðlaunin, Barnamenningarhátið og Big Bang fóru fram á vordögum og Seigla og Jazzhátið síðsumars.
Hörpustrengir
Í samstæðunni er rekstrarfélagið Hörpustrengir sem hefur þann tilgang að standa fyrir völdum viðburðum sem marka spor í íslenskt tónlistar- og menningarlíf og myndu ekki verða að veruleika án aðkomu félagsins. Hátíðardagskrá fyrir landsmenn á Menningarnótt er stærsti viðburður Hörpu á árinu þar sem boðið er upp á vandaða dagskrá fyrir unga sem aldna og gestum að kostnaðarlausu.
