Heim­sókn í Hörpu

Harpa leggur mikið upp úr barnamenningu og í mars 2022 var opnað sérstakt upplifunarrými fyrir börn og fjölskyldur þeirra, einstakur staður til að uppgötva töfraheim hljóðs og tóna.  Rýmið hlaut hið fallega nafn Hljóðhimnar og er staðsett á jarðhæðinni. Nánari upplýsingar um Hljóðhimna og barnadagskrá.

Athugið að börn þurfa ávallt að vera í fylgd með fullorðnum og á ábyrgð þeirra. Kaupa þarf sæti fyrir börn í Eldborg, nema annað sé tekið fram.

Harpa stundar rafræna vöktun í öryggis- og eignavörsluskyni og er ábyrgðaraðili þeirrar rafrænu vöktunnar sem fram fer í húsnæði Hörpu. Aðeins er heimilt að nota eftirlitsmyndavélar í Hörpu í samræmi við fyrrgreindan tilgang.

Átta útimyndavélar eru við húsið, tvær á vegum Hörpu eru í bílakjallara og 21 á vegum 115 security og 54 myndavélar eru inni í byggingunni.

Upplýsingar sem verða til við vöktun eftirlitsmyndavéla eru ekki varðveittar lengur en í 30 daga og hafa einungis forstjóri, fasteignastjóri og öryggisverðir á vakt heimild til að skoða myndefni úr eftirlitsmyndavélum og þá aðeins að sérstakt tilefni sé til.

Einungis er heimilt að skoða myndefni við sérstök tilefni, s.s. ef grunur leikur á að öryggisbrot eða brot sem varðar refsiábyrgð hafi átt sér stað í Hörpu sem þörf er á að sannreyna. Harpa má ávallt afhenda lögreglu myndefni í tengslum við rannsókn einstakra mála.

Eftirlitsmyndavélar í bílakjallara Hörpu sem eru á vegum 115 Security eru annars vegar að mynda í sama tilgangi og aðrar eftirlitsmyndavélar í og við Hörpu en einnig eru vélar sem lesa á bílnúmeraplötur. Framkvæmdarstjóri og fjármálastjóri 115 Security hafa aðgang að þeim gögnum sem verða til og er einungis afhent lögreglu í tengslum við rannsókn einstakra mála.

Frekari upplýsingar um réttindi einstaklinga í tengslum við þessa vöktun má nálgast Hörpu í netfanginu: personuvernd@harpa.is.

Allir sem kaupa miða á viðburði í Hörpu fá aðgöngumiða sendan í tölvupósti sem dugar við inngang, hvort sem það er útprentað eða í snjallsímanum. Einnig er hægt að sækja miða í miðasölu Hörpu.

Hópar ferðamanna eru velkomnir í Hörpu til að skoða húsið á þeim svæðum sem eru opin almenningi á hverjum tíma. Vinsamlega athugið þó að ekki er heimilt að skipuleggja skoðunarferðir fyrir ferðamenn um húsið á vegum annarra en Hörpu. Tekjuaflandi starfsemi fyrirtækja eða leiðsögumanna vegna heimsókna í Hörpu er því með öllu óheimil. Ástæðurnar eru að hávaði, og/eða stærðir hópa sem virða ekki aðgangstakmarkanir, trufla iðulega viðburðahald og hindra því miður oft aðgengi annarra gesta að Hörpu.

Mikilvægt er að allir gestir Hörpu virði merkingar, aðgangstakmarkanir og aðrar ráðstafanir til að stýra flæði fólks um húsið.

Í Hörpu eru leiðsögu- og hjálparhundar velkomnir og höfum við tekið frá ákveðin sæti í sölum Hörpu sem ætluð eru gestum með hjálparhund. Sætin þarf að panta í miðasölu Hörpu.

Eftirfarandi sæti eru ætluð gesti með leiðsögu- eða hjálparhund:

• Eldborg: Gert er ráð fyrir gesti með leiðsögu- eða hjálparhund á þriðju svölum.
• Silfurberg: Gert er ráð fyrir gesti með leiðsögu- eða hjálparhund aftast í sal hægra megin.
• Norðurljós: Gert er ráð fyrir gesti með leiðsögu- eða hjálparhund aftast í sal vinstra megin.
• Kaldalón: Gert er ráð fyrir gesti með leiðsögu- eða hjálparhund á aftasta bekk í salnum.

Leiðsöguhundur/hjálparhundur skal ekki vera í sæti eða í gangvegi, heldur skal hann sitja eða liggja á gólfi fyrir framan/til hliðar við eiganda sinn. Ef mögulegt er skal hundurinn vera með múl og skýrt merktur sem leiðsöguhundur/hjálparhundur, til dæmis með beisli eða vesti.

Sætapöntun fer fram í gegnum midasala@harpa.is eða í beinu númeri miðasölu 528-5050.

Vinsamlega athugið reglur um vottun og merkingar hjálpar- og leiðsöguhunda. Notendur hjálpar- og leiðsöguhunda fá afhent sérstök skírteini til að framvísa þegar á þarf að halda. Harpa áskilur sér rétt til að vísa hundi frá sé slíkt skírteini ekki tiltækt. Sjá nánar á Hjálparhundar Íslands og á Leiðsöguhundar.

Engar sérstakar reglur gilda um klæðaburð á tónleikum en það er alltaf gaman að klæða sig upp.

Harpa tekur kvikmyndun fagnandi og við reynum að mæta þörfum eftir bestu getu. Við erum þó bundin af bókunarstöðu hússins og að Harpa er höfundarréttarvarin. Því þurfa ljósmynda- og upptökuverkefni að vera borin undir framkvæmdastjórn Hörpu, hönnuði og arkitekta hússins. Tekið er gjald fyrir myndatökur og upptökur fyrir stærri verkefni. Í öllum tilvikum ber að fá leyfi frá markaðsdeild Hörpu. Nánari upplýsingar.

Í Hörpu er ókeypis internet fyrir gesti og gangandi.

Vinsamlega neytið ekki matar og drykkjar í Eldborg. Aðrar reglur gilda þó um aðra tónleikasali og fer það eftir eðli viðburðar hvað er leyfilegt. Vinsamlegast kynnið ykkur reglur varðandi mat og drykk við þjónustufulltrúa á vakt.

Verði gestir varir við mistur eða reyk í bílakjallara Hörpu er ekkert að óttast. Það þýðir einfaldlega að það er viðburður í Eldborg þar sem notast er við leikhúsreyk á sviðinu. Útsog úr Eldborg er notað til að hita upp glerhjúp Hörpu og bílakjallarann til að nýta hitann og gera Hörpu umhverfisvænni.

Allar upptökur á tónleikum hvort sem er hljóð eða mynd eru stranglega bannaðar í Hörpu nema með sérstöku leyfi. Það sama gildir um myndatökur, hvort heldur kvikmyndir eða ljósmyndir. Myndatökur í opnum rýmum eru leyfðar svo framarlega sem þær trufla ekki starfsemi hússins. Nánari upplýsingar.

Öll notkun farsíma á tónleikum er bæði óæskileg og óleyfileg. Nauðsynlegt er að slökkva á símunum meðan á tónleikum stendur.

Vinsamlega sendið inn fyrirspurn um óskilamuni eða týnda lykla að fatahengi í gegnum formið hér fyrir neðan. Harpa geymir óskilamuni í einn mánuð áður en þeir eru gefnir til góðgerðarmála.

Senda inn fyrirspurn.

Reykingar eru bannaðar innandyra í Hörpu sem og að veipa.