10. júní 2024
Kalabanté fjöllistahópurinn í Hörpu
Daglegt líf í Gíneu er innblástur sýningarinnar Africa in Circus sem er full af lífsgleði, litadýrð, tónlist, dansi og ótrúlegum sirkuslistum.
![](http://images.ctfassets.net/nl35sbcspsvu/1AxcsMHvzvDdr3rgrFfp6B/ddd55688d3e6f748bc75d695b8251c6a/034__MG_7950_KALABANTE___Christine-Hewitt_small800x533.jpg?w=800&h=533&fl=progressive&q=100&fm=jpg)
Sýningar dagana 7. og 8. september í Eldborg. Miðasala hefst 13. júní klukkan 10:00.
Daglegt líf í Gíneu er innblástur sýningarinnar Africa in Circus sem er full af lífsgleði, litadýrð, tónlist, dansi og ótrúlegum sirkuslistum. Sýningin hefur farið sigurför um heiminn og fengið einróma lof gagnrýnanda. Áhorfendur mega búa sig undir að taka andköf af undrun á meðan listafólkið leikur á þyngdarlögmálið og möguleika líkamans.
Tónlistin sem hópurinn flytur er bræðingur af afró, funk og jazz með hljóðfærum frá Vestur-Afríku eins og djembe trommu, balafon og strengjahljóðfærinu kora í bland við kunnulegri hljóðfæri eins og saxófón, bassa og trommusett.
„Makes Cirque du Soleil look tame“ – The Sydney Morning Herald „A celebration of diversity and dizzying fun“– Parra News „Impeccably performed slice of family-friendly circus“– Culture Fix
Sýningin er eftir fjöllistamanninn og listræna stjórnandann Yamoussa Bangoura. Áhugi Bangoura á sirkuslistum vaknaði á uppvaxtarárunum í Conakry í Gíneu þar sem hann lærði sirkuslistir í gegnum evrópska sjónvarpsdagskrá. Aðferðirnar þróaði hann síðan enn frekar með Nyamakala-sirkushefðum sem kenndar eru við Fula-þjóðflokkinn í Vestur-Afríku. Í framhaldi gekk hann til liðs við gíneska sirkusinn Circus Baobob sem hann ferðaðist með um Afríku og Evrópu. Árið 2000 gekk Bangoura til liðs við Cirque Eloize í Kanada og á meðan hann dvaldi þar í landi kom hann einnig fram með Cirque du Soleil og Cavalia sirkusnum. Yamoussa Bangoura lét svo draum sinn rætast árið 2007 þegar hann stofnaði Kalabanté Productions og fékk til liðs við sig meðal annars tvíburasystur sína, bróður og frændur.
Kalabanté Productions rekur sitt eigið stúdíó og skóla í Montréal í Kanada auk þess sem fyrirtækið stendur að byggingu Kalabanté-skólans í Conakry, höfuðborg Gíneu. Markmiðið með byggingu skólans er að gefa ungmennum tækifæri á þjálfun í þverfaglegum listum og gera þeim kleift að vinna við listir.
Kalabanté Prodcutions tók þátt í gerð heimildamyndarinnar Circus Without Borders árið 2010 en myndin er samstarfsverkefni Kalabante og Artcirq-sirkussins. Aðstandendur myndarinnar, Guillaume Saladin og Yamousse Bangoura eru bestu vinir og loftfimleikamenn í heimsklassa sem deila draumi um að veita von og stuðla að umbótum í samfélögum sínum með sirkuslistakennslu. Í myndinni heimsækja sirkusarnir kanadískar norðurslóðir og Gíneu þar sem þeir bjóða ungum inúítum og Gíneubúum að kynnast töfraheimi sirkuslistanna til að sporna gegn sjálfsvígum, fátækt og örvæntingu.
Fréttir
27. ágúst 2024
Takk fyrir frábæra Menningarnótt í Hörpu!
Harpa þakkar gestum fyrir komuna í Hörpu á Menningarnótt og einnig öllu því stórkostlega listafólki sem kom fram, saman gerðuð þið daginn ógleymanlegan.
23. ágúst 2024
Gott að vita
Menningarnótt í Hörpu
21. ágúst 2024
Tónleikaröðin Upprásin hefst aftur
Grasrótin blómstrar í Hörpu