World Geothermal Congress (WGC) er stærsta ráðstefna um jarðvarma í heiminum og fer fram á fimm ára fresti víðs vegar um heiminn.  Upphaflega átti ráðstefnan að fara fram á Íslandi á síðasta ári en óhefðbundnir tímar kölluðu á nýja nálgun. 

Því var ákveðið að hefja viðburðinn í netheimum núna á vordögum með fimm fundardögum, í fjórum lotum, frá apríl til júlí. Í dag hefst seinni fundarlotan sem stendur yfir í þrjá daga. Á þessum dögum munu 162 klst. af efni verða streymt úr Hörpu til yfir 5000 þátttakenda víðs vegar um heiminn. 

Ráðstefnan sjálf verður haldin í Hörpu í október næstkomandi þar sem fræðsla, viðburðir og kynningar á alþjóðlegum verkefnum í jarðvarma fer fram. Markmið WGC er að leiða saman helstu sérfræðinga, vísindamenn, stjórnvöld og aðra hagaðila til að ræða nýtingu auðlinda á sjálfbæran og vistvænan máta.