Upprásin - Smjörvi, Matching Drapes og Silkikett­irnir

Á þessum tónleikum koma fram Smörvi, Matching Drapes og Silkikettirnir

Harpa, í samstarfi við Tónlistarborgina Reykjavík, Rás 2 og Landsbankann, stendur fyrir nýrri tónleikaröð sem tileinkuð er grasrót íslenskrar tónlistar, þvert á tónlistarstefnur. Tónleikaröðin kallast Upprásin og fer fram í Kaldalóni eitt þriðjudagskvöld í mánuði veturinn 2024-2025. Hún fer nú fram annað árið í röð og munu samtals 27 hljómsveitir koma fram, þrjár á hverju tónleikakvöldi.

Tónleikaröðin er liður í því að framfylgja dagskrárstefnu Hörpu um bætt aðgengi grasrótar og ungs fólks í öllum tónlistargreinum og auka við fjölbreytni. Markmiðið er einnig að tónlistaráhugafólk geti gengið að því vísu að heyra fjölbreytta nýja íslenska tónlist, beint úr grasrót tónlistarlífsins, flutta við kjöraðstæður í tónlistarhúsi þjóðarinnar.

Miðaverð er aðeins 2000 kr. en hægt er að leggja til hærri upphæð í miðasöluferlinu sem rennur beint til listafólksins.

• Smjörvi

Smjörvi, rísandi stjarna í íslensku senunni svífur átakalaust gegnum stefnur og strauma með viðmóti sem er töfrandi og veitir innblástur. Frumraun hans, breiðskífan “svo heilagt!” var tilnefnd til Grapevine tónlistarverðlaunanna 2024, en breiðskífan er tilraunakennd og undir áhrifum frá hversdeginum og öllu því sem verður á vegi Smjörva.

Matching Drapes er post-pönk indíband sem var upphaflega stofnað sem hluti af verkefni í BIMM háskólanum í Berlín af Arndísi Rán og Jacquie Hirt árið 2023. Sveitin hefur svo þróast og er nú fullskipuð með Liam Harrison á sólógítar, Toby Savill á rythmagítar, Nicolas Liebling á bassa og Adrian Lizarraga á trommum. Sveitin ber með sér fjölbreyttan tónlistarstíl og ögrar karllægum gildum með kraftmikilli framkomu og grípandi melódíum.

Ólíkir straumar koma saman í tónlist Silkikattanna; Ljóðlist og rapp, dularfullar bassalínur, ófyrirsjáanlegur ásláttur og kynleg rafhljóð. Bergþóra Einarsdóttir og Guðrún Hulda Pálsdóttir mynda Silkikettina, en fyrsta smáskífa þeirra “Smurðar fórnir” kom út árið 2023 og hlaut tvær tilnefningar til íslensku tónlistarverðlaunanna. Sterk sviðsframkoma kattanna hefur vakið verðskuldaða athygli, þar sem dans og myndbandalist flæða saman við tónlistarflutning og gerir tónleika þeirra að þverfaglegu listaverki.