Upprásin - Sóða­skapur, Inki og Blair­stown

Á þessum tónleikum koma fram Sóðaskapur, Inki og Blairstown

Harpa, í samstarfi við Tónlistarborgina Reykjavík, Rás 2 og Landsbankann, stendur fyrir nýrri tónleikaröð sem tileinkuð er grasrót íslenskrar tónlistar, þvert á tónlistarstefnur. Tónleikaröðin kallast Upprásin og fer fram í Kaldalóni eitt þriðjudagskvöld í mánuði veturinn 2024-2025. Hún fer nú fram annað árið í röð og munu samtals 27 hljómsveitir koma fram, þrjár á hverju tónleikakvöldi.

Tónleikaröðin er liður í því að framfylgja dagskrárstefnu Hörpu um bætt aðgengi grasrótar og ungs fólks í öllum tónlistargreinum og auka við fjölbreytni. Markmiðið er einnig að tónlistaráhugafólk geti gengið að því vísu að heyra fjölbreytta nýja íslenska tónlist, beint úr grasrót tónlistarlífsins, flutta við kjöraðstæður í tónlistarhúsi þjóðarinnar.

Miðaverð er aðeins 2000 kr. en hægt er að leggja til hærri upphæð í miðasöluferlinu sem rennur beint til listafólksins.

• Sóðaskapur

Sóðaskapur er hin ófullkomna og subbulega hlið pönksins. Lög Sóðaskaps eru afköst áralangrar reiði gagnvart yfirvaldinu, feðraveldinu og kapítalismanum. Sóðaskapur er þriggja kvenna hljómsveit sem einblínir á fegurðina í ljótleikanum og þau vandamál sem fylgja því að vera ungur meðlimur samfélagsins í dag. Markmið þeirra eru þó að hafa gaman og skemmta öðrum sóðum.

Inki (Ingibjörg Friðriksdóttir) hefur komið víða við í tónlist sinni en verk hennar hafa hljómað bæði í Evrópu og vestan hafs. Hún hefur smíðað sjálfspilandi hljóðfæri, skapað hljóðinnsetningar og gaf nýverið út breiðskífuna “Thoughts Midsentence”. Tónlistin er allt í senn aðgengileg og tilraunakennd, en búast má við þungum bassalínum, silkimjúkum strengjaleik, slagverki og hráum krafti elektrónísks hljóðheims. Á Upprásinni mun Inki flytja lög af nýju plötunni í bland við glænýtt efni, en með henni leika Höskuldur Eiríksson á slagverk, PALMR á hljóðgervla og gítar, ásamt strengjatríói.

Blairstown er hljómsveit sem var stofnuð fyrir lokaverkefni í hljóðupptökunámi í Studió Sýrlandi. Splunkunýja hljómsveitin stefndi á upptökur og bókuðu stúdíó, en úr varð að allir meðlimir sveitarinnar gleymdu að þeir hefðu stofnað hljómsveit og neyddust til að semja allt efnið daginn fyrir upptökur. Meðlimir í Blairsworn eru Hlynur Sævarsson, Magnús Már Newman og Alexander Grybos.